എന്താണ് മുല്ലപ്പെരിയാര്‍ അണക്കെട്ടുമായി ബന്ധപ്പെട്ടുള്ള യഥാര്‍ത്ഥ പ്രശ്നം? "തമിഴ് നാടിനു വെള്ളം, കേരളത്തിനു സുരക്ഷ" എന്ന് അര്‍ത്ഥ ശങ്കക്കിടമില്ലാത്ത വിധം പ്രഖ്യാപിച്ചു കൊണ്ട് കേരളത്തിന്റെ സ്വന്തം ചെലവില്‍ അണക്കെട്ട് നിര്‍മിച്ചു കൊള്ളാം എന്ന് നമ്മുടെ മുഖ്യ മന്ത്രി വാഗ്ദാനം നല്‍കിയിട്ടും അംഗീകരിക്കാത്ത തമിഴ് നാടിന്റെ നിലപാട് വെറും രാഷ്ട്രീയം കളിക്കലല്ലേ? അല്ലെങ്കില്‍ അതിനെ എതിര്‍ക്കാന്‍ അവര്‍ക്ക് വ്യക്തമായ ന്യായങ്ങള്‍ വല്ലതും പറയാനുണ്ടോ? അതോ നമ്മുടെ രാഷ്ട്രീയ നേതാക്കളാണോ രാഷ്ട്രീയം കളിക്കുന്നത്? എന്നിങ്ങിനെയുള്ള പല ചോദ്യങ്ങള്‍ നിങ്ങളുടെ ബുദ്ധിയില്‍ പലപ്പോഴും തെളിഞ്ഞു വന്നിട്ടില്ലേ? "മുഖ്യ മന്ത്രിക്കാണോ വാക്ക് പിഴച്ചത്?" എന്ന തലക്കെട്ടില്‍ ശ്രീ. സി ആര്‍ നീലകണ്ഠന്‍ എഴുതിയ ഒരു ചെറു ലേഖനം അടുത്തിടെ മാതൃഭൂമി പത്രം പ്രസിദ്ധീകരിച്ചിരുന്നു. അത് കാണാത്തവരും മുല്ലപ്പെരിയാര്‍ അണക്കെട്ടിനെ കുറിച്ചുള്ള സത്യാവസ്ഥ അറിയണമെന്ന് താല്പര്യമുള്ളവരും ആയവര്‍ക്ക് വേണ്ടി ആ ലേഖനം അതേപടി ഇവിടെ പകര്‍ത്തി എഴുതുന്നു.
മുഖ്യമന്ത്രിക്കാണോ വാക്ക് പിഴച്ചത്?
ഒടുവില്‍ മുല്ലപ്പെരിയാര്‍ കേവലം കക്ഷി-മുന്നണി രാഷ്ട്രീയ തര്‍ക്കമായി മാറിയിരിക്കുന്നു. പുതിയ ഡാമിന്റെ നിയന്ത്രണം സംബന്ധിച്ച് മുഖ്യമന്ത്രിയും റവന്യൂമന്ത്രിയും നടത്തിയ പ്രസ്ഥാവനകളെ ആധാരമാക്കി രാഷ്ട്രീയ മുതലെടുപ്പ് നടത്താന്‍ പ്രതിപക്ഷം കച്ച മുറുക്കുന്നു. കേരളത്തിന്റെ താല്പര്യങ്ങള്‍ ഹനിക്കുന്നു; സര്‍വകക്ഷി തീരുമാനങ്ങള്‍ ലംഘിക്കുന്നു തുടങ്ങിയവയാണ് പ്രതിപക്ഷത്തിന്റെ ആരോപണങ്ങള്‍. പഴയ അണക്കെട്ട് ലക്ഷക്കണക്കിന്‌ മനുഷ്യരുടെ ജീവനും സ്വത്തിനും ഭീഷണിയാണെന്നതിനാല്‍ പുതിയ അണക്കെട്ട് എന്ന ആശയം മുന്നോട്ടു വെച്ചത് മുന്‍ എല്‍ ഡി എഫ് സര്‍ക്കാരാണ്. അന്ന് (ഇന്നും) ഡാമിന്റെ അവകാശം, കാലാവധി തുടങ്ങിയ വിഷയങ്ങള്‍ സംബന്ധിച്ച് ഇടതു പക്ഷത്തിനു വ്യക്തമായ ധാരണയുണ്ടായിരുന്നുവോ എന്നതാണ് ജനങ്ങളുടെ സംശയം.
പുതിയ ഡാം വരുന്നത് കേരളത്തിന്റെ അധീനതയിലുള്ള മണ്ണിലാണെന്നതിനാല്‍ പഴയ പാട്ടക്കരാര്‍ മതിയാവില്ല. പുതിയത് വേണം. പുതിയ ഡാമിന്റെ നിയന്ത്രണം സംബന്ധിച്ച പ്രസ്ഥാവനകളാണല്ലോ തര്‍ക്ക വിഷയം. ഇതിന്റെ സമ്പൂര്ണ നിയന്ത്രണം കേരളത്തിനു വേണമെന്ന് ഇടതു പക്ഷം പറയുന്നു. ഇപ്പോള്‍ തമിഴ് നാടിന്റെ പൂര്‍ണ നിയന്ത്രണത്തിലുള്ള ഡാം പിടിച്ചടക്കാന്‍ കേരളം നടത്തുന്ന കുത്സിതശ്രമമാണ് സുരക്ഷാഭീഷണിയെന്ന അവരുടെ വാദത്തിനു നാം തന്നെ ന്യായീകരണം നല്‍കുകയാണിവിടെ.
ഡാമിന്റെ നിയന്ത്രണാധികാരത്തെക്കാള്‍ നിര്‍ണായകമാണ് പുതിയ കരാര്‍ എത്ര കാലത്തെക്കായിരിക്കുമെന്നത്. പുതിയ ഡാമിന്റെ ആയുസ്സ് 70 വര്‍ഷമെന്ന് കണക്കാക്കിയാല്‍ അതിനപ്പുറമുള്ള കാലത്തേക്ക് പുതിയ കരാര്‍ നീട്ടാനാകുമോ? തമിഴ്നാടിന് ശേഷിക്കുന്ന 873 വര്‍ഷത്തേക്ക് അവകാശമുണ്ട്‌. നിലവിലുള്ള കരാറനുസരിച്ച് ഇത് അംഗീകരിക്കാന്‍ കേരളം തയ്യാറായാല്‍ ഓരോ എഴുപതു വര്ഷം കഴിയുമ്പോഴും പുതിയ ഡാമുകള്‍ താഴേക്കു കെട്ടണം. ഇത് വരും തലമുറകള്‍ക്ക് എത്ര വലിയ ദുരന്തമാകുമെന്ന് പറയേണ്ടതില്ല. ചുരുക്കത്തില്‍ അണക്കെട്ടിന്റെ നിയന്ത്രണം, കരാറിന്റെ കാലം തുടങ്ങിയവയില്‍ വലിയ 'ഇളവു'കള്‍ക്ക് തമിഴ്നാട് തയ്യാറായാല്‍ മാത്രമേ പുതിയ ഡാം എന്ന ആശയം തന്നെ പ്രസക്തമാകുന്നുള്ളൂ. കേവലം തമിഴ്നാടിന് ജലം കേരളത്തിനു സുരക്ഷ അതിനായി പുതിയ ഡാം എന്ന ലളിത സമസ്യയല്ല. തമിഴ്നാടിന് ഒരു തുള്ളി വെള്ളത്തിനായി എല്ലാം മറന്നു ഒന്നിച്ചു നിന്ന് പോരാടുന്ന തമിഴ്നാട് ഇത്തരം വിട്ടു വീഴ്ച്ചകള്‍ക്ക് തയ്യാറാകുമെന്നാണോ 'പുതിയ ഡാം'എന്നതിനായി വാദിക്കുന്ന ഇടതു വലതു നേതാക്കള്‍ കരുതുന്നത്?
പെരിയാര്‍ കടുവാസങ്കേതത്തിലാണ് പുതിയ ഡാം എന്നതടക്കം നിരവധി മറ്റു കടമ്പകളുണ്ട്. ഇവയെല്ലാം മറികടന്നു കേരളത്തിന്റെ ആവശ്യം നേടിയെടുക്കാന്‍ ക്ന്ദ്രസര്‍ക്കാര്‍ സഹായിക്കുമോ? കേന്ദ്ര പ്രതിരോധമന്ത്രി എ കെ ആന്റണി പറഞ്ഞത്പോലെ ഒരു ദേശീയ കക്ഷിക്കും ഈ വിഷയത്തില്‍ ആഖിലേന്ത്യാ നിലപാടില്ല. തങ്ങളുടെ കക്ഷിക്ക് വ്യക്തമായ നിലപാട് ഉണ്ടെന്ന് പ്രതിപക്ഷ ഉപനേതാവ് കോടിയേരി ബാലകൃഷ്ണന്‍ പറയുന്നു. ആ നിലപാട് മലയാളത്തിലും തമിഴിലും ഇംഗ്ലീഷിലും ഒന്ന് പ്രസിദ്ധീകരിച്ചാല്‍ കൊള്ളാം എന്നെ നമുക്ക് പറയാനുള്ളൂ.
സുപ്രീം കോടതിയും ഇക്കാര്യത്തില്‍ കേരളത്തിനെ സഹായിക്കുമെന്ന് കരുതാനാവില്ല. പകരം ഇരു സംസ്ഥാനങ്ങളും സഹവര്‍ത്തിത്വത്തോടെ ചര്‍ച്ച നടത്തുക മാത്രമാണ് വഴി. നിയന്ത്രണം, കാലം തുടങ്ങിയ വിഷയങ്ങളില്‍ തമിഴ് നാട് പറയുന്ന വ്യവസ്ഥകളെല്ലാം അംഗീകരിക്കാന്‍ കേരളം തയ്യാറായാല്‍ മാത്രമേ 'പുതിയ ഡാം' എന്നതിന് തമിഴ്നാട് അംഗീകാരം നല്കുകൂ എന്നതാണ് സത്യം. ഇത് തുറന്നു പറയുകയായിരുന്നു റവന്യൂ മന്ത്രി എന്ന്മാത്രം. ഈ വടി ഉപയോഗിച്ച് സര്‍ക്കാരിനെ അടിക്കാനും (കഴിയുമെങ്കില്‍) താഴെ ഇറക്കി പുതിയതൊന്നു ഉണ്ടാക്കാനും ഇടതുപക്ഷം ശ്രമിക്കുന്നതില്‍ തെറ്റില്ലായിരിക്കും. ഇടതു പക്ഷം ഭരിച്ചാല്‍ അണക്കെട്ട് പൊട്ടാതെ നില്‍ക്കുമായിരിക്കും.
എന്നാല്‍ ഇപ്പോഴത്തെ പ്രതിസന്ധിയുടെ യഥാര്‍ത്ഥ കാതല്‍ ഇതൊന്നുമല്ല. അനുമതിക്ക് വിദൂര സാധ്യത പോലുമില്ലെന്നറിഞ്ഞിട്ടും ലക്ഷക്കണക്കിന്‌ മനുഷ്യരുടെ ജീവനെന്നതുവെച്ചു പുതിയ ഡാം എന്ന ആവശ്യം ഉന്നയിച്ചതിലാണ് തെറ്റ്. ഇപ്പോള്‍ അണക്കെട്ട് സുരക്ഷിതമല്ലെങ്കില്‍, എന്താകുമെന്നു ഉറപ്പില്ലാത്ത ഡാം പരിഹാരമാകുന്നതെങ്ങിനെ? എന്തായാലും അടിയന്തര പരിഹാരം പുതിയ ഡാമല്ലെന്ന സത്യം ജനങ്ങള്‍ പുതുക്കെയാണെങ്കിലും തിരുച്ചറിയുന്നുണ്ട്.
